تیری حمد کیسے ہو یا خدا تیری شان جل_جلالہ

تیری حمد کیسے ہو یا خدا تیری شان جل جلالہ

نہیں مثل تیرا ترے سوا تیری شان جل جلالہ

تو ہے خالق حجر و شجر تو ہے رازق ملک و بشر

تیری حمد کرتے ہیں بحر و بر تیری شان جل جلالہ

تو خیال میں نہ سما سکے نہ گمان و وہم میں آ سکے

نہ کوئی قیاس میں لا سکے تیری شان جل جلالہ

تیرا میں ازل سے ہوں مبتلا تیرا وصل ہے میرا مدعا

تیرے آستاں پہ ہوں آ پڑا تیری شان جل جلالہ

تیرے نام پر ہوں مٹا ہوا میرے دل میں تو ہے بسا ہوا

ہے زباں پہ بس یہی چڑھا ہوا تیری شان جل جلالہ

توہی بے کسوں کا رفیق ہے توہی عاجزوں کا شفیق ہے

تو رحیم ہے تو کریم ہے تیری شان جل جلالہ

تیری کر سکے کوئی کیا ثنا تیرے وصف ہووے بشر سے کیا

ہے ظہور تیرا ہر ایک جا تیری شان جل جلالہ

تیرا نام ہے کیمیا تیری ذات عالی ہے بے بہا

تیرے در کا مجھ کو ہے آسرا تیری شان جل جلالہ

تیرے فضل پر ہے نظر میری ہے تیری طرف کو بصر میری

لے خبر مری لے خبر مری تیری شان جل جلالہ

تیرا بندہ ناصرؔ ؔتفتہ جاں تیرے نام کا ہے وظیفہ خواں

اسے کر دے زہدۂ عارفاں تیری شان جل جلالہ