خبرا حسنِ دل آرائے رسولِ عربی

خبرا حسنِ دل آرائے رسولِ عربی

خود ہے اللہ بھی شیدائے رسولِ عربی

اپنی آنکھوں کا ہر اک اس کو بنائے سرمہ

گر ملے خاکِ کفِ پائے رسولِ عربی

ابرِ رحمت ابھی سب دفترِ عصیاں دھو دے

کاش آجائے ذرا پائے رسولِ عربی

کیوں نہ ہو فخرِ مدینہ کی زمیں کو حاصل

اس نے پائے ہیں کفِ پائے رسولِ عربی

ہر دمک میں ہے اسی نور کا جلوہ دیکھو

صاف روشن ہے تجلّائے رسولِ عربی

ہم گنہگاروں کو دلوائی ہے اللہ سے اماں

ہم پہ کیا کیا ہیں عطاہائے رسولِ عربی

شبِ معراج ملک کہتے تھے سبحان اللہ

دیکھ کر حسنِ دل آرائے رسولِ عربی

سر تو خم ہوتے ہیں تسلیم کو جس کے آگے

ہے وہ زیبا قدِ زیبائے رسولِ عربی

خلق کرتی ہے صدا میری تواضع کیاکیا

سر میں ہے میرے جو سودائے رسولِ عربی