میمنت آگیں ہے نام مصطفیٰ

میمنت آگیں ہے نام مصطفیٰ

ہے پیام حق پیام مصطفیٰ

ہیں سلاطیں بھی غلام مصطفیٰ

ہے یہ شان و اہتمام مصطفیٰ

اہل ظلمت ہو گئے زار و زبوں

تھا وہ تزک و احتشام مصطفیٰ

اہل دنیا پہ کھلا معراج سے

کتنا ارفع ہے مقام مصطفیٰ

ایک ہوں کیوں کر نہ محمود و ایازؔ

ساغر وحدت ہے جام مصطفیٰ

کر رہے ہیں اس کی عظمت کے سبب

برہمن بھی احترام مصطفیٰ

بے گماں اے کرشن موہنؔ ثبت ہے

قلب گیتی پر دوام مصطفیٰ