پہیلیوں کا رچیتا وہ زندہ دل شاعر

پہیلیوں کا رچیتا وہ زندہ دل شاعر

سہیلیوں کا چہیتا وہ عشق کا کافر

جو کہہ مکرنیوں اور چٹکلوں کا تھا رسیا

وہ میت گیتوں کا اہلِ وفا کا من بسیا

وہ نغمہ سنج عظیم و شہیر، وہ فاضل

مرید پہنچے ہوئے پیر کا، خدا مائل

وہ مردِ مستانہ

خیال و ایمن و قول و ترانہ، قلبانہ

اسی کی دین ہیں سنگیت کو، اسی نے تو

وہ اجتہادِ سراپا تھا نابغہ خسرو

ستار کو وہ رسیلا، انوپ روپ دیا

کہ جس نے اپنے سروں سے دلوں کو موہ لیا

کئی زبانوں کا ماہر تھا رہبرِ کامل

فریدِ عصر تھا، سرشار عالمِ و عامل

وہ فارسی کا سخن ور، کوی تھا ہندی کا

وہ ترکی و عربی، سنسکرت کا بھی شیدا

اسے عزیز تھی پنجابی اور سندھی بھی

کہی اسی نے غزل سب سے پہلے اردو کی

کہ جدت و ندرت

صفت تھی اس کے شعورِ ہزار پہلو کی

وہ اتحادِ مذاہب کا شوخ پیغمبر

تھا بیکسوں کا حبیب لبیب، ژرف نظر

حق آشنا تھا بشر دوستی کا موسیقار

عطا وجود کا پیکر، غنا کا شاہسوار

غبارِ راہ سمجھتا تھا مال و دولت کو

وطن پرست فقیر امیر دل خسروؔ

امیر ایسے ہی، دھرتی کا غم بٹاتے ہیں

فقیر ایسے تو صدیوں کے بعد آتے ہیں