اے شہنشاہِ تغزل اے امام فکر و فن

اے شہنشاہِ تغزل اے امام فکر و فن

تیرے شعروں کی روانی موجۂ گنگ و جمن

اللہ اللہ تیری غزلوں کا مزاجِ رنگ و بو

جس طرح غنچے کنول کے جیسے گلہائے سمن

تیرا لہجہ نغمگی کی روح، موسیقی کی جان

لفظ و معنیٰ کی جوانی تیرا اندازِ سخن

سعدی و حافظ کی صف کے شاعرِ شیریں نوا

تو کہ اپنی ذات سے تھا فارسی کی انجمن

بس ترے خوانِ کمال شعر کے زلّہ رُبا

رند ہو یا پارسا ہو، شیخ ہو یا برہمن

امتزاجِ شعر و نغمہ، ربطِ آہنگ و نوا

ہے اسی فن کی بدولت اتحادِ جان و تن

کہہ مکرنی ہو پہیلی ہو کہ ہوں وہ لوک گیت

طفلِ اردو کو پہنا یا تو نے پہلا پیرہن

تو ہے خود اپنی جگہ شعر و سخن کی روشنی

جگمگا اٹھے ترے افکار سے کوہ و دمن

ندرتِ لفظ و بیاں بھی، جدتِ تخئیل بھی

ہے سلاست میں نزاکت سادگی میں بانکپن

موجدِ عشاق اے نغمہ نواز و نغمہ گر

راگنی دیوی نے خود آکر چھوئے تیرے چرن

صاحبِ فکرِ رسا اے شاعرِ شیریں نوا

ہر غزل کا تیری مطلع صبح کی پہلی کرن

تیری پُر گوئی کی مل سکتی نہیں شاید مثال

شعر خود ہوتے تھے موزوں ارتجالاً دفعۃَ

بحرِ عرفاں کے شناور، صاحبِ حال و مقام

تیرے دم سے لہلہا اٹھا طریقت کا چمن

آمدم دربار گاہت نغمہ سنج و مدح خواں

ہدیۂ از من بگیر اے خسروِ ملک سخن