کس بیم و رجا کے عالم میں طیبہ کی زیارت ہوتی ہے

کس بیم و رجا کے عالم میں طیبہ کی زیارت ہوتی ہے

اک سمت شریعت ہوتی ہے اک سمت محبت ہوتی ہے

اس دل پہ خدا کی رحمت ہو جس دل کی یہ حالت ہوتی ہے

اک بار خطا ہو جاتی ہے، سو بار ندامت ہوتی ہے

اے صلی علیٰ! ایک ایک ادا اللہ کی آیت ہوتی ہے

ہے روئے محمد پیشِ نظر قرآں کی تلاوت ہوتی ہے

اک وہ بھی مقدر ہوتا ہے اک ایسی بھی قسمت ہوتی ہے

بو جہل یوں ہی رہ جاتا ہے، بو ذر کو ہدایت ہوتی ہے

جو بات وہ فرما دیتے ہیں معیارِ صداقت ہوتی ہے

دستورِ عمل بن جاتی ہے اور دین میں حجت ہوتی ہے

طیبہ کے ببولوں کے کانٹے پھولوں سے بھی نازک تر نکلے

تلوؤں کو بھی لذت ملتی ہے، آسودہ طبیعت ہوتی ہے

مقصودِ جہاں، محبوبِ خدا اور اس پہ یہ شانِ فقر و غنا

کپڑے بھی وہ خود دھولیتے ہیں فاقوں کی بھی عادت ہوتی ہے

’’اتممت علیکم‘‘ فرما کر اللہ نے خود اعلان کیا

اتمامِ کرم اب ہو تو چکا، بس ختم نبوت ہوتی ہے