جو نور_خاص تھا وہ سید_ابرار میں دیکھا

جو نور خاص تھا وہ سید ابرار میں دیکھا

ظہور جان جاناں احمد مختار میں دیکھا

بیاں عاشق سے ہو سکتا ہے کب اس روئے روشن کا

نشان احمدی کو حیدر کرار میں دیکھا

نمایاں حسن جانا ہے جمال خوب رویاں سے

تماشائی خدائی حضرت دیدار میں دیکھا

حقیقت میں نیاز و راز کب کھلتا ہے ہر اک کو

کھلا دیکھا تو ہم نے شبلی و عطار میں دیکھا

تجلی جلوہ فرما ہر جگہ ہے اس کی اے خادمؔ

جو بوجھے گا وہ دیکھے گا جو ہم نے یار میں دیکھا