خسرو اک البیلا شاعر، جس کے روپ ہزار

خسرو اک البیلا شاعر، جس کے روپ ہزار

کہیں سپاہی، کہیں وہ صوفی، کہیں وہ موسیقار

شاہی درباروں میں بیٹھے، درباری کہلائے

آ کے فقیروں کی مجلس میں دل کی مرادیں پائے

من کی پیاس سے بے کل ہو کر پنگھٹ پنگھٹ گھومے

کوئی گگریا پھوٹ بہے تو لہر میں آ کر جھومے

چھیڑے اپنے سازِ سخن پر ایسے شوخ ترانے

جن کی اک اک تان کے اندر دھڑکیں لاکھ زمانے

آئینۂ دوش و فردا بے لوث طبیعت اس کی

کیا کچھ دیکھے اور دکھائے چشمِ بصیرت اس کی

روح کو مالا مال بنائیں اس کی باتیں اس کے بول

اک اک لفظ احساس کی دولت اک اک حرف انمول

اس نے کتابِ دل کی لکھیں وہ با معنی تفسیریں

صحیفحۂ جاں اہلِ محبت کا اس کی تحریریں

امر رہا ہے اور رہے گا اس کا نام و کلام

ثبت ہے لوحِ شام و سحر پر اس کا نقشِ دوام