ویسے تو کھلاتا ہے ہر اک صحن‌_چمن پھول

ویسے تو کھلاتا ہے ہر اک صحن‌ چمن پھول

محفوظ خزاں ہے مرے آقا کا بدن پھول

گر اشک فشاں ہو غم محبوب میں شبنم

ہو جائے یم عشق سے غنچوں کا بدن پھول

گلزار تو ہیں نام کے کانٹے بھی ہیں جن میں

سر تا بہ قدم ہے تن سلطان زمن پھول

سرکار کے کاندھوں پہ ہیں حسنین کچھ ایسے

جیسے کہ کھل آئے ہوں سر شاخ سمن پھول

گلزار کھلاتا ہوا چل راہ وفا میں

اے جذبۂ سرشار سر دار و رسن پھول

جنت تو فریدیؔ کی وہ گلزار ہے جس میں

قدرت نے کھلائے ہیں حسین اور حسن پھول