رسولؐ_پاک کی چشم_عنایت ہو تو کیا کہنا

رسولؐ پاک کی چشم عنایت ہو تو کیا کہنا

ہمیں بھی ان کے روضے کی زیارت ہو تو کیا کہنا

حقیقت ہجر کی کھلنے نہ پائے ان کے عاشق پر

تصور میں رخ پاک رسالت ہو تو کیا کہنا

سر شانہ تو سب سر سرور و سردار ہوتے ہیں

سر نوک سناں شان سیادت ہو تو کیا کہنا

بٹھائے اپنے کندھے پر جو اک مزدور سید کو

رضا جیسی اگر شان مودت ہو تو کیا کہنا

کوئی پل بھی فریدیؔ یاد جاناں سے نہ خالی ہو

محبت ان کی سانسوں کی ضرورت ہو تو کیا کہنا