الف احمد میں بے مد کا ہے اور آدم میں ہے مد کا

الف احمد میں بے مد کا ہے اور آدم میں ہے مد کا

یہی باعث ہے جو سایہ نہیں تھا آپ کے قد کا

خدا کا شکر ہے شیدا ہوں میں روئے محمد کا

بھلا پھر پوچھنا کیا ہے مری تقدیر کی حد کا

نہ مجھ کو خوف تربت کا نہ کھٹکا روزِ محشر سے

زباں پر ورد ہے میرے محمد ہی محمد کا

ترے صدقہ ترے قرباں میرے پیرِ مغاں تو نے

بنایا والہ و شیدا مجھے روئے محمد کا

طواف کعبہ جس نے کر لیا اس کو یہ لازم ہے

کہ دیکھے شوقِ دل سے جا کے وہ روضہ محمد کا

یہ چاہا جب خدا نے معرفت بندوں کو ہو حاصل

تو پیدا کردیا دنیا میں اس نے نور احمد کا

جلو میں تھے شبِ معراج کیا ان کا مقدر ہے

ملا روح الامیں کو خوب یہ موقع خوشامد کا

مرا مرنا نہیں مرنا مرا مرنا تو جینا ہے

مرے ہر سانس کے ہے ساتھ نام پاک احمد کا

شبِ معراج جب عرشِ بریں پر آپ جا پہنچے

ملائک نے مچایا غل خوش آمد کا خوش آمد کا

قدومِ پاک سے ہر اک نبی نے فیض پایا ہے

نفس عیسیٰ نے اور موسیٰ نے پایا معجزہ ید کا

در والا پہ یہ ہوتا تو ملتا اور ہی رتبہ

مگر ایسا مقدر ہی کہاں تھا سنگِ اسود کا

پتہ عرفان والوں نے سوا اس کے نہیں پایا

ظہور دو جہاں ہے پرتو انور محمد کا

ھوالاول ھوالآخر سے ثابت ہوگیا بے شک

ظہور دو جہاں ہے پرتو انور محمد کا

مقدر پر مجھے جو ناز ہو منظورؔ وہ کم ہے

کہ دیکھ آیا ہوں ان آنکھوں سے میں روضہ محمد کا