مرحبا کوچہ_احمد سے صبا آئی ہے

مرحبا کوچہ احمد سے صبا آئی ہے

بوئے گلزار مدینہ یہ اڑا لائی ہے

آپ کے ذکر سے محفل میں بہار آئی ہے

جس طرف دیکھیے رحمت کی گھٹا چھائی ہے

سرو شمشاد بھی حیرت سے کھڑے تکتے ہیں

قد سرور میں وہ رعنائی و زیبائی ہے

کیوں نہ ہو رتبہ بلند عرش علی سے اس کا

جس کو حاصل در والا کی جبیں سائی ہے

اس کے پرتو سے منور ہوا سارا عالم

واہ کیا روئے محمد نے ضیا پائی ہے

فرقت شاہ میں اب کیا کہوں کیا حالت ہے

صبر کی تاب نہ یارائے شکیبائی ہے

اپنا شیوہ تو ہے اگلوں کے قدم پر چلنا

اتباع نبوی سنت آبائی ہے

اے صفیؔ تجھ پہ ہے فیضان اویس قرنی

دولت عشق نبی جو ترے ہاتھ آئی ہے