جنابِ مصطفیٰ وجہ وجود انسی و جانی

جنابِ مصطفیٰ وجہ وجود انسی و جانی

چراغ کعبہ شمع طور نور عرش سبحانی

قریشی ہاشمی و یثربی مکی و عدنانی

بڑی نسبت تو سب سے یہ ہے تم ہو خاص رحمانی

غرض ہے ما عرفنا ہے بیانِ عجزا نسانی

تری ہستی ہے ورنہ شاہبازِ اوج عرفانی

حروف خطِ قسمت برقِ ایمن کی طرف چمکیں

جو کوئی نقشِ پا پر تیرے رکھ دے اپنی پیشانی

زمین و آساں جلوے سے ترے اس طرح روشن

خدا کے نور سے عرشِ منور جیسے نورانی

شبِ معراج ما زاغ البصر کی نصِ محکم سے

خدا بینی تری ثابت ہے واضح ہو خدا دانی

نظر افروز عالم گر نہ ہو نور رخ احمد

تو ہو ہر پردۂ چشم بشر جلباب ظلمانی

سنانے مژدۂ آمد ترا دنیا میں آئے تھے

جناب ابن مریم حضرت موسیٰ عمرانی

حرم بت خانہ صحرا بحر دریا بن گیا وادی

بدل دی آتے ہی تو نے تو شکل عالمِ فانی

مسیحا نے جو مردوں کو جلایا تو عجب کیا ہے

بہائم میں عرب کے تونے پھونکی روح انسانی

ابھی چرخ بریں سے حضرت عیسیٰ اتر آئیں

جو ان کو ہاتھ آجائے در اقدس کی دربانی

اگر نامِ حبیب کبریا نقشِ نگیں ہوتا

تو گم ہرگز نہ ہونی مہرِ انگشت سلیمانی

مجھے حاصل ہے لطفِ خاص دردِ عشق احمد میں

قیامت تک رہے اللہ یہ میری گر اں جانی

بیانِ نعت احمد کے لیے اللہ نے اطہرؔ

ودیعت میری فطرت میں کیا حسن سخن دانی