تاجدارِ انبیا اے رحمۃ للعالمیں!

تاجدارِ انبیا اے رحمۃ للعالمیں

تیری رحمت کے ہیں طالب سیکڑوں اندوہ گیں

میہمانِ لامکاں محبوب رب دو جہاں

فرش خاکی سے گیا تو برسر عرش بریں

تیرے پیغامات سے روشن ہے ساری کائنات

تیرے پیغامات کا ہر حرف ہے پہلو نشیں

اے کرم فرمائے عالم ہم پہ بھی لطف و کرم

زندگی کی مشکلیں ہم سے تو حل ہوتی نہیں

جذبہ ایمان سے خالی ہیں کردار عمل

دل کی بستی میں نہیں ہے جلوہ حسن یقیں

طالبان التفات خاص کا یہ حال ہے

ہر نظر ظلمت زدہ ہے ہر نفس غم آفریں

زندگی پامال ہے برباد ہے ویران ہے

اے فروغ زندگی، روشن نظر، روشن جبیں

شامت اعمال نے گھیرا ہے ہم کو اس طرح

سیکڑوں آلام ہیں لبریز ہے قلب حزیں

کون پہنچا ہے ترنمؔ لامکاں کی بزم میں

طور پر کوئی، کوئی چرخ چہارم پر مکیں