ہیں صفات رب کے مظہر رحمۃ للعٰلمین

ہیں صفات رب کے مظہر رحمۃ للعٰلمین

تُو ہے طاہر تو ہے اطہر رحمۃ للعٰلمین

صاحبِ لولاک ہیں اور باعثِ تکوین خلق

خاصہ خلاق اکبر رحمۃ للعٰلمین

عرش و کرسی ماہ و خور، ارض و فلک لوح و قلم

جھک رہے ہیں تیرے در پر رحمۃ للعٰلمین

بام و در سنگ و شجر سرشار کیف وعظ سے

رونق محراب و منبر رحمۃ للعٰمین

لی مع اللہ، قاب قوسین، دنیٰ تیرے مقام

مرحبا اللہ اکبر رحمۃ للعٰلمین

تیری شان عرش رفعت تیری عظمت دیکھ کر

آسماں نے کھائے چکر رحمۃ للعٰلمین

والضحیٰ ہے رخ ترا واللیل ہے زلف دوتا

اور پسینہ مشک و عنبر رحمۃ للعٰلمین

انبیا و مرسلیں ابدال غوث و صالحیں

کل کے مولیٰ سب کے رہبر رحمۃ للعٰلمین

بندہ آقا، اسود احمر، تیرے در پر ہوگیے

مل کے باہم شیر و شکر رحمۃ للعٰلمین

تم ہو محمود و محمد زیب دیتی ہے تمہیں

ہر ثنا بہتر ہے بہتر رحمۃ للعٰلمین

اے ترنمؔ ہے تجھے کیوں خطرہ یوم الحساب

ہیں شفیع روزِ محشر رحمۃ للعٰلمین