جلوہ ہر سمت ہے اے شمع تجلی تیرا

جلوہ ہر سمت ہے اے شمع تجلی تیرا

مظہر نورِ خدا ہے رخ زیبا تیرا

تیرے انفاس میں نوخیز گلوں کی خوشبو

مطلع نور مقدس ہے سراپا تیرا

تیرے کردار کی عظمت ہے منقش دل پر

آسماں بوس ہے اخلاق کا رتبہ تیرا

سب سے افضل ہے محبت میں محبت تیری

فخر عشاق ہے ہر چاہنے والا تیرا

وہ جو ہیں شیوۂ تسلیم و رضا سے واقف

دیکھتے رہتے ہیں ہر بات میں منشا تیرا

حامل حسن سماعت ہو جو گوش انساں

سینہ ساز میں بھی ہوتا ہے نغمہ تیرا

تیرے دیوانے جہاں بخش و جہاں مار رہے

عظمت اہلِ خرد کیوں نہ ہو سودا تیرا

اس کے دامن سے مٹے داغ سیہ کاری کے

جس نے بھی دیکھ لیا نقش کفِ پا تیرا

تو ہے بے مثل ہے نبیوں میں، تو ہی یکتا ہے

کوئی ہمسر کوئی ثانی نہیں دیکھا تیرا

ایک مجموعہ اعجاز ہے تیری ہستی

حسنِ یوسف، دمِ عیسیٰ، یدِ بیضا تیرا

مجھ کو دنیا کی محبت سے سروکار نہیں

دل میں ارماں ہے فقط اے شہِ بطحا تیرا

میرے سینے میں فروزاں ہے چراغِ ایماں

مجھ کو کچھ خوف نہیں ہے شب یلدا تیرا

اک ترنمؔ ہی نہیں تیری تمنا کا اسیر

بزمِ ہستی میں نہیں ہے کسے سودا تیرا