نقش و نگار عالم امکاں تمہی تو ہو

نقش و نگار عالم امکاں تمہی تو ہو

زیبائش فضائے گلستاں تمہی تو ہو

مجھ کو یقیں ہے کہ شبستانِ دہر میں

پاکیزگیٔ صبح گلستاں تمہی تو ہو

اہلِ نظر کو جس سے ملا نور مستقل!

ایماں فزا وہ چشمۂ عرفاں تمہی تو ہو

فکر و نظر میں تم سے ضیائے دوام ہے

اک انتہائے جلوہ تاباں تمہی تو ہو

تخلیق کائنات کا باعث ہے کس کی ذات

کہتا ہے دل کہ سرور دوراں تمہی تو ہو

وابستہ ہے تمہی سے تمنائے زندگی

میری کتاب شوق کا عنواں تمہی تو ہو

اک نگہ لطف سوئے ترنمؔ کبھی کبھی

نبیوں کے تاج فخر رسولاں تمہی تو ہو