حضرت نے نقش وحدت دل پر بٹھا دیے ہیں

حضرت نے نقش وحدت دل پر بٹھا دیے ہیں

ذہنوں سے غفلتوں کے پردے اٹھا دیے ہیں

جچتے نہیں نظر میں نقش و نگار عالم

روئے نبی نے ایسے جلوے دکھا دیے ہیں

قلب رسول میں تھا امت کا غم یہاں تک

آنکھوں سے آنسوؤں کے چشمے بہا دیے ہیں

ہے یہ بھی فیض بخشی حبِ حبیب حق کی

داغ گناہ دل سے سارے مٹا دیے ہیں

اللہ کی اطاعت ایمان ہے ہمارا

حضرت نے ایسے نغمے ہم کو سنا دیے ہیں

بیداری جہاں کا ایسا سبق دیا ہے

مدت سے سونے والے انساں جگا دیے ہیں

اب دل میں ہیں ترنمؔ یاد نبی کے جلوے

غم اپنی زندگی کے ہم نے بھلا دیے ہیں