مرے دل میں ہزاروں جلوے ہیں مجھے تابش رخ کی ضیا کی قسم

مرے دل میں ہزاروں جلوے ہیں مجھے تابش رخ کی ضیا کی قسم

میں ہوں بندہ شاہد ارض و سما، مجھے شاہد ارض و سما کی قسم

مرے سر پہ ہے سایہ لطف و کرم، مجھے پرسش عصیاں سے کیا غم

مجھے فکر نہیں ہے جہنم کی، تری بخشش و جود و سخا کی قسم

مجھے بزم جہاں سے کام نہیں کہ مذاق طلب مرا خام نہیں

جہاں ذکر محمد ہوتا ہے، مری بزم وہی ہے خدا کی قسم

مجھے زیست کی راہ گزاروں پر ہر لحظہ ہے چلنا شام و سحر

کوئی فکر مقام و قیام نہیں، مجھے گردش صبح و مسا کی قسم

ہنس ہنس کے ملے ہیں دشمن سے، ہر جابر و ظالم و پر فن سے

نہیں دیکھا کسی میں یہ استغنا، مجھے شیوۂ صبر و رضا کی قسم

ترا عشق ہی میرا حاصل ہے، ترا عشق ہی میری منزل ہے

ترے در سے کبھی نہ اٹھوں گا، مجھے اپنی ہی روح وفا کی قسم

میرے دل میں وہ نغمے پنہاں ہیں، مرے دل میں وہ جذبے خنداں ہیں

کہ جہان ترنمؔ رقصاں ہے اسی بربطِ نغمہ سرا کی قسم