کونین کے گوشے گوشے پر چھائی ہوئی رحمت ہوتی ہے

کونین کے گوشے گوشے پر چھائی ہوئی رحمت ہوتی ہے

محبوبِ خدا کی دنیا میں جب عیدِ ولادت ہوتی ہے

اس جانِ بہار کی آمد سے ہر ایک روِش ہر گلشن میں

کھِلتے ہیں شگوفے رحمت کے انوار کی کثرت ہوتی ہے

تخلیق میں پہلے نور ان کا آخر میں ہوا ہے ظہور ان کا

تکوینِ جہاں ہے ان کے لیے ختم ان پہ نبوت ہوتی ہے

میثاق کے دن سب نبیوں سے اقرار لیا تھا ان کے لیے

اب آتے ہیں وہ سردارِ رسل اب ان کی ولادت ہوتی ہے

اقصیٰ میں جماعت نبیوں کی دیکھی تو فرشتے بول اٹھے

کیا خو ب جماعت ہوتی ہے کیا خوب امامت ہوتی ہے

تھے جن و بشر حور و غلماں استادہ پئے تعظیمِ نبی

کیوں لوگ قیام کے منکر ہیں کیا ان پہ قیامت ہوتی ہے

تعظیم کا منکر شیطاں تھا وہ دیوِ لعیں مردود ہوا

توقیرِ نبی جو کرتے نہیں خواراں کی جماعت ہوتی ہے

تحمیدِ خدا تو صیفِ نبی تسبیح و ثنا تعظیمِ نبی

میلادِ نبی کی ہر محفل عنوانِ عبادت ہوتی ہے