میرے آقا مرے مولیٰ مرے پیارے خواجہ

میرے آقا مرے مولیٰ مرے پیارے خواجہ

میری آنکھوں میں سما جا میرے پیارے خواجہ

میں چھپا لوں تجھے تو کوئی نہ دیکھے تجھ کو

آنکھوں سے دل میں اتر آ میرے پیارے خواجہ

کس طرح غم میں ترے عمر مری کٹتی ہے

کچھ مرا حال بھی پوچھا میرے پیارے خواجہ

آستانے پہ ترے میں نے لگا دی دھونی

اب تو اس در سے نہ اٹھوا مرے پیارے خواجہ

بوالعلا تیرے ہیں میں ان کا ہوں اے ماہ جمال

ہے یہی میرا طریقہ میرے پیارے خواجہ

میری آنکھوں میں بھی ہو تیری نگاہوں کا اثر

ہے یہ اکبرؔ کی تمنا مرے پیارے خواجہ