میرے پاس ایسی زباں کہاں تیری شان جل_جلالہ

میرے پاس ایسی زباں کہاں تیری شان جل جلالہ

تیری حمد کو جو کرے بیاں تیری شان جل جلالہ

ہیں چمن میں سینکڑوں بجلیاں مجھے کون جز تیرے دے اماں

میرا چار تنکوں کا آشیاں تیری شان جل جلالہ

جہاں شیطنت کا ظہور ہے جہاں ظلمتوں کا وفور ہے

تیرا حسن ہے وہیں ضو فشاں تیری شان جل جلالہ

نہ مٹا سکیں نہ مٹا سکے مجھے کائنات کے حادثے

میری زندگی کی ہے پاسباں تیری شان جل جلالہ

جو تھے ظلمتوں میں گرے ہوئے جو تھے تیرے دیں سے پھرے ہوئے

انہیں راہ حق کے ملے نشاں تیری شان جل جلالہ

تیرا حسن ہے میرا مدعا تیرا عشق ہے میرا رہنما

تیرا ذکر ہے میری داستاں تیری شان جل جلالہ

مجھے ہر قدم تیری جستجو مجھے ہر نفس تیری آرزو

مجھے اپنا غم ہے نہ غم جہاں تیری شان جل جلالہ

غم دو جہاں سے بچا کے تو مجھے اپنی حفظ و اماں میں رکھ

میرے رہنما میرے پاسباں تیری شان جل جلالہ

جو غم دو جہاں سے اداس ہے جسے صرف تیری ہی آس ہے

میں وہی ہوں مائلؔ خستہ جاں تیری شان جل جلالہ