میری سمت مشکلوں نے جو کبھی نظر اٹھائی

میری سمت مشکلوں نے جو کبھی نظر اٹھائی

وہیں یاد فخر رحمت میری رہبری کو آئی

یہ ہے وصف فخر عالم یہ ہے شان مصطفائیؐ

جہاں ان کا ذکر چھیڑا وہیں جھوم اٹھی خدائی

مجھے ان کا ہے تصور میرے سامنے ہے روضہ

میں کہاں ہوں اور کہاں تک مری ہو گئی رسائی

تو فدائے خلد زاہد میں ہوں زائر مدینہ

تیری خلد تک رسائی میری عرش تک رسائی

میری روح جھوم اٹھی میرا دل ہوا منور

وہ مئے جمال وحدت مجھے آپ نے پلائی

مجھے دیکھ کر یہ بولی سر حشر حق کی رحمت

ترے واسطے ہے جنت تو نبیؐ کا ہے فدائی

جہاں راہ حق سے شیداؔ میرے پاؤں ڈگمگائے

وہیں ان کی رحمتوں نے میری کی ہے رہنمائی