روئے احمد پر یہ دل شیدا ہوا اچھا ہوا

روئے احمد پر یہ دل شیدا ہوا اچھا ہوا

اخترِ قسمت چمک اٹھا مرا اچھا ہوا

مجھ کو خالق نے کیا پیدا جو امت میں تری

شکر ہے یا مصطفیٰ اچھا ہوا اچھا ہوا

ڈر مجھے حد سے سوا تاریکئ مرقد کا تھا

نور احمد نے جو دل گھر میں کیا اچھا ہوا

الفت نور خدا نے کی جو میری رہبری

دل سے میرے لا مکاں تک راستہ اچھا ہوا

میں یہی کہتا ہوا سونپوں گا جان اللہ کو

ہجر احمد میں مری آئی قضا اچھا ہوا

دل کے آئینہ میں ہے نورِ نبی جلوہ فگن

مل گیا صد شکر صورت آشنا اچھا ہوا

کیوں نکالوں میں ترے تیر نظر کو قلب سے

دوسرا دل مجھ کو خالق نے دیا اچھا ہوا

دیکھ کر بستی محمد کی کہا دل نے مرے

ہو مدینہ اور میں کیا پوچھا اچھا ہوا

ہجر احمد میں خوشی اس کی ہے اے شایقؔ مجھے

دردِ دل دردِ جگر بڑھتا چلا اچھا ہوا