کروں کیا رتبۂ اعلیٰ بیاں مخدوم صابر کا

کروں کیا رتبۂ اعلیٰ بیاں مخدوم صابر کا

ہے جلوہ تا زمین و آسماں مخدوم صابر کا

نشان و بے نشاں اندر نشاں مخدوم صابر کا

مکان ولا مکاں اندر مکاں مخدوم صابر کا

گیا کلیر میں جو کوئی رہی خواہش نہ کعبے کی

ہے بیت اللہ اسے وہ آستاں مخدوم صابر کا

دیا رتبہ عجب حق نے ملا یا ذات اپنی میں

ہے اوصافِ الم نشرح عیاں مخدوم صابر کا

چلو اے چشتیو تم سر کے بل پیران کلیر میں

وہاں ہے فیض کا دریا رواں مخدوم صابر کا

طلب ہو چشتیو جس کو جمالِ احمدِ مرسل

لقا ہے بادشاہِ دو جہاں مخدوم صابر کا

رایت اللہ کا جلوہ رخ صابر نمایاں ہے

عیاں ہے ذاتِ حق سرِّ نہاں مخدوم صابر کا

لحد میں آن کر پوچھیں ملائک کس کا بندہ ہے

کہوں گا میں تو ہوں بندہ میاں مخدوم صابر کا

محبت میراںؔ شاہ دل میں جسے تا اول و آخر

رہے ہر دم میرا وردِ زباں مخدوم صابر کا