اے پاک ذاتِ مصطفیٰ بلغ العلیٰ بکمالہٖ

اے پاک ذاتِ مصطفیٰ بلغ العلیٰ بکمالہٖ

اے خاص محبوبِ خدا کشف الدجی بجمالہٖ

کرتے ہیں سب صفت و ثنا حسنت جمیع خصالہٖ

ہر دم وظائف ہے مرا صلوا علیہ واٰلہٖ

وہ کون تیری شان ہے تو شان خود رحمٰن ہے

تو جان ہر دو جہان ہے صلوا علیہ والہ

مشتاق تیرا ہے خدا تو آپ خود ہے حق نما

اے شافع روزِ جزا صلو علیہ والہٖ

اے غمگسارِ مفلساں غمخوار عاجز بیکساں

اے پیشوائے مرسلاں صلوا علیہ واٰلہٖ

قرآن تیری شان ہے قرآن کی تو جان ہے

تو عالمِ عرفان ہے صلو علیہ واٰلہٖ

اے مالکِ دنیا و دیں اے صاحبِ عرشِ بریں

اے رحمت اللعٰلمیں صلوا علیہ واٰلہٖ

اے مظہرِ نورِ خدا اے ہادی شاہ و گدا

اے حامئی روزِ جزا صلو علیہ واٰلہٖ

اب یا محمد لو خبر پھر وقت جائے گا گزر

پڑھتا ہوں میں شام و سحر صلوا علیہ واٰلہٖ

اے حضرتِ خیرالبشر تم نے کیا شق القمر

ہے قلب انساں تیرا گھر صلو علیہ واٰلہٖ

اے مخزنِ نورِ خدا اے معدنِ لطف و عطا

اے گوہرِ بحرِ سخا صلوا علیہ واٰلہٖ

اے سرورِ پیغمبراں جب حشر کا دن ہو عیاں

اس دم زباں سے ہو رواں صلو علیہ واٰلہٖ

ہے اول و آخر توئی ہے باطن و ظاہر توئی

ہے حاضر و ناظر توئی صلو علیہ واٰلہٖ

اے افتخارِ ہر نبی اے فیض بخشِ ہر ولی

اے جان و دل مولا علی صلوا علیہ واٰلہٖ

اے مالکِ ملکِ عرب جن و ملائک ملک سب

پڑھتے ہیں ہو کر با ادب صلو علیہ واٰلہٖ

کیا در تری کی شان ہے غیروں کا کیا امکان ہے

جبریل خود دربان ہے صلوا علیہ واٰلہٖ

عاجز کو مت ترسائیے لطف و کرم فرمائیے

دیدار اب دکھلائیے صلوا علیہ واٰلہٖ

ہے میراںؔ شاہ درکا گدا بر حق ہو تم کان سخا

مئے شوق کی کیجے عطا صلوا علیہ واٰلہٖ