آمدِ شہ پر سجے ہیں مشرقین و مغربین

آمدِ شہ پر سجے ہیں مشرقین و مغربین

نور میں ڈوبے ہوئے ہیں مشرقین و مغربین

زمزمے گاتے ہیں خوشیوں کے سبھی حور و ملک

مدح خوانی کر رہے ہیں مشرقین و مغربین

مصطفیٰ خیرالوریٰ تو صاحبِ لولاک ہیں

ان کے صدقے میں بنے ہیں مشرقین و مغربین

واقفِ اسرار حق نے کر دیا سرکار کو

کب نگاہوں سے چھپے ہیں مشرقین و مغربین

جب خدا بھی نہ چھپا اس صاحبِ معراج سے

پھر بھلا کیا کوئی شے ہیں مشرقین و مغربین

انبیا دیتے رہے آقا کے آنے کی خبر

شاہ کو پہچانتے ہیں مشرقین و مغربین

چاند دو ٹکڑے ہوا ڈوبا ہوا سورج پِھرا

حکم ان کا مانتے ہیں مشرقین و مغربین

ہر زمانے کی زباں میں مصطفیٰ کی نعت ہے

مدحتوں سے گونجتے ہیں مشرقین و مغربین

لامکاں ان کو بلایا رب نے قربِ خاص میں

آج پیچھے رہ گئے ہیں مشرقین و مغربین

ہے کتابِ آخری قرآن وہ ختم الرسل

یہ گواہی دے رہے ہیں مشرقین و مغربین

وجہِ تخلیقِ جہاں مرزاؔ انہیں کی ذات ہے

مصطفیٰ کے واسطے ہیں مشرقین و مغربی