محبوبِ خدا سرورِ ذیشان درخشاں

محبوبِ خدا سرورِ ذیشان درخشاں

بندوں پہ ہیں اللہ کا احسان درخشاں

طیبہ کے ہیں نہ صرف گلستان درخشاں

ہیں شہرِ مدینہ کے بیابان درخشاں

رخسار و لب و عارضِ سرکار کی کیا بات

ہیں لعلِ یمن شاہ کے دندان درخشاں

اللہ کے محبوب کی عظمت پہ بلا شک

ناطق ہے ہر اک آیتِ قرآن درخشاں

بندوں کو عطا کی درِ حق تک ہے رسائی

ان سے ہی ملا رب کا ہے عرفان درخشاں

اصحابِ نبی سارے ہی ذیشان ہیں لیکن

صدیق و عمر حیدر و عثمان درخشاں

جاں اپنی لٹاتے ہیں یہ ناموسِ نبی پر

دنیا میں ہے عشاق کی پہچان درخشاں

دن رات رخِ سرورِ کونین تھے تکتے

اصحابِ محمد کا ہے ایمان درخشاں

ہو سوزِ جگر آنکھ بھی نم دل ہو تڑپتا

طیبہ کے یہ زائر کا ہے سامان درخشاں

گرمی کی تمازت سے ملے امن و اماں گر

محشر میں ملے شاہ کا دامان درخشاں

کرتا ہے رقم شاہِ مدینہ کی یہ مدحت

مرزاؔ پہ ہے سرکار کا احسان درخشاں