رخ پرنور پر احمد کی یوں زلف معنبر ہے

رخ پرنور پر احمد کی یوں زلف معنبر ہے

گھٹا رحمت کی جیسے سایہ افگن چاندنی پر ہے

زمیں پر مصطفیٰ ہیں اور خدا عرشِ بریں پر ہے

یہاں کچھ اور منظر ہے وہاں کچھ اور منظر ہے

شبِ معراج کی بس مختصر روداد ہے اتنی

ابھی تھا عرش پر سب کچھ ابھی سب کچھ زمیں پر ہے

کوئی محشر میں دیکھے مرتبہ شاہِ دوعالم کا

کہ رحمت عام ہے تاج شفاعت زینت سر ہے

خدا اس کا بہشت اس کی زمین وآسماں اس کے

سب اس کا ہے محمد کی نگاہ رحم جس پر ہے

جو ان پر مٹ گیا سمجھو کہ عقبیٰ بن گئی اس کی

جو ان پر مرگیا دنیا میں وہ زندوں سے بہتر ہے

چلو اسلمؔ مدینے تم بھی محتاج کرم بن کر

کہ اس در کی گدائی بادشاہی سے بھی بڑھ کر ہے