کوئی پوچھے ہمارے دل سے رتبہ شاہِ قاتل کا

کوئی پوچھے ہمارے دل سے رتبہ شاہِ قاتل کا

ہیں خود شیدائے حق عالم ہے شیدا شاہِ قاتل کا

یہاں آئیں ذرا اہلِ حقیقت دل کریں روشن

بنا ہے مطلعِ انوارِ روضہ شاہِ قاتل کا

ولایت ہو تو ایسی ہو تصرف ہو تو ایسا ہو

نظر ہر رنگ میں آیا کرشمہ شاہِ قاتل کا

اثر اعجاز کا رکھتی تھی ان کی ہر نظر گویا

دلوں کو زندہ کرتا تھا اشارہ شاہِ قاتل کا

وہ قطب الواصلیں بھی ہیں سراج السالکیں بھی ہیں

کہ اہل اللہ میں رتبہ ہے اعلیٰ شاہِ قاتل کا

تصور میں مرے دن رات صورت ان کی رہتی ہے

میں خود اپنے ہی میں پاتا ہوں جلوہ شاہِ قاتل کا

ہمیں دیر و حرم کا کشمکش سے کیا غرض واعظ

ہمارے واسطے کعبہ ہے روضہ شاہِ قاتل کا

ہوئے مغفور وہ آئے شورؔ یہ تاریخ تم لکھ دو

رہے گا حشر تک آنکھوں میں جلوہ شاہِ قاتل کا