اے تو کہ حیادار شبستان تخیل

اے تو کہ حیادار شبستان تخیل

اے تو کہ بموجب گل ولالہ وسنبل

اے تو کہ جمالِ ازلستان تمنا

اے تو کہ تجلی وہ صد جلوہ سینا

تووہ کہ ترے دم سے تمناؤں کے دھارے

تو وہ کہ دلوں میں تری فرقت کے شرارے

تو وہ کہ سرور نظرو راحت جاں بھی

تو وہ کہ نگاہوں سے نہاں اور عیاں بھی

تو وہ کہ ہر اک شے میں تری جلوہ نمائی

تو وہ کہ زمیں تا بہ فلک تیری خدائی

جب پیش نظر ہوتی ہے پھولوں کی صباحت

کرتی ہے گذر دل میں تری یادوں کی راحت

جب نغمہ سرا ہوتی ہیں معصوم فضائیں

آتی ہیں دلوں تک ترے دامن کی ہوائیں

یہ مہرومہ واختر و پرویں یہ ستارے

تیرے رخِ روشن کے ہیں تابندہ نظارے

آرائش وتزئین دروبام ہے تجھ سے

ہاں معرفت کعبۂ دل عام ہے تجھ سے

توہی ہے تجلی وہ کاشانۂ ہستی

تیراہی عطیہ ہے بلندی ہو کہ پستی

ارباب نظر پا ہی گئے تیرا ٹھکانا

ہوتا ہی رہا لاکھ نہ ملنے کا بہانا

ہے تجھ کو مری سوزش پنہاں کی خبر بھی

سو طور مچلتے ہیں نگاہوں میں ادھر بھی

حالم ز فراقِ تو خراب است نظر کن

در قصر تمنائے دلم بارے گذر کن