محمد احمد ہے اسمِ سامی لقب بشیر و نذیر ان کا

محمد احمد ہے اسمِ سامی لقب بشیر و نذیر ان کا

ہے شرع میں مثل غیر ممکن محال عقلی نظیر ان کا

عجب بلند ان کی شانِ عالی نہ ایسا کوئی ہوا نہ ہوگا

کہ تاجوران کے در کا خادم غلام صاحبِ سریر ان کا

وہ ایک بھاری کرور پر تھے سپاہ و لشکر کا ڈرنہ کرتے

خدائے غالب ہر اک جگہ پر معاون ان کا نظیر ان کا

وہ ایسے شاہنشہ جہاں تھے کہ تذکرے ان کے بر زباں تھے

سریر خاقاں سے تھا معظم ہزار درجہ حصیر ان کا

جلال و رعب ان کا کیا بیاں ہو زباں ہے قاصر سخن وروں کی

شہنشہوں سے خراج لیتا بزور ہر اک وزیر ان کا

وہ لائے ایسی کتاب برحق کہ شبہ جس میں نہیں ہے مطلق

بجز خدائے قوی و قادر نہ کوئی ہادی نہ پیر ان کا

کمال تائید حق تھی ان پر کہ اک زمانِ قلیل ہی میں

بڑھا ہے ادیانِ ماضیہ سے یہ دین آفاق گیران کا

نصیب برگشتہ جن کے ہوں گے پھریں گے وہ ان کے راستے سے

ازل میں جو بختور ہے نزہتؔ وہی ہے فرماں پذیر ان کا