مکرم تر محمد مصطفیٰ ہیں

مکرم تر محمد مصطفیٰ ہیں

رسولوں میں حبیب کبریا ہیں

بڑے منصب ہیں میکائیل جبریل

محمد رتبہ میں ان سے سوا ہیں

حقیقت میں جناب مصطفیٰ کی

خرد حیران کیا جانے وہ کیا ہیں

یہ ثابت ہے کہ خدامِ محمد

حجابِ کبریائی تک رسا ہیں

نعیم و جنت الفردوس ماویٰ

شہِ کونین کے بستاں سرا ہیں

نبوت اور رسالت سے علاوہ

تفاخریہ کہ محبوب خدا ہیں

خدا کے دوستوں میں ہیں وہ لاریب

نبی کے جس قدر اہلِ ولا ہیں

سراپا نور ہے جسمِ مقدس

کہ حضرت پر توِ رب العلا ہیں

وہی ہیں مورد سلم الٰہی

وہی منزل گہ صلِ علیٰ ہیں

محقق ہے کہ دیوانِ جزا میں

وہی پیش خدا صدر العلیٰ ہیں

مدارج آپ کے اللہ جانے

بشر کیا اس کے عقل و ہوش کیا ہیں

کہا خالق نے غیب آگاہ ان کو

کہ وہ شمس الضحیٰ بدرالدجیٰ ہیں

وہی ایمان میں کامل ہیں نزہتؔ

جو مال و جان سے ان پر فدا ہیں