نثار چاند ہے قربان آفتاب کی دھوپ
نثار چاند ہے قربان آفتاب کی دھوپ
ہے خوشگوار عجب روئے آنجناب کی دھوپ
اے آفتابِ فصاحت فصیح کہتے ہیں
کھلی ہے صحنِ سخن میں ترے خطاب کی دھوپ
حضور اپنی شفاعت کے سائے میں رکھیے
جلائے مجھ کو نہ عصیاں کے احتساب کی دھوپ
عطائے مہرِ رسالت تو عام ہے لیکن
ہو جیسا صحنِ دل آتی ہے اس حساب کی دھوپ
سبھی نجومِ نبوت ہیں مستفید اس سے
ملی ہے سب کو مدینے کے آفتاب کی دھوپ
جھلس گیا وہ جہنم کی آگ سے گویا
پڑی ہے جس پہ ذرا آپ کے عتاب کی دھوپ
رہے ثنائے محمد کا سایہ سر پہ مرے
گزار یوں مرے مولیٰ مرے شباب کی دھوپ
جسے بھی نورِ خدا سایۂ کرم بخشے
پڑے گی اس پہ نہ رب کی قسم عذاب کی دھوپ
عیاں ہیں روئے معظمؔ سے اس لیے انوار
کہ صحن دل میں ہے عشقِ فلک مآب کی دھوپ
Additional information available
Click on the INTERESTING button to view additional information associated with this sher.
About this sher
rare Unpublished content
This ghazal contains ashaar not published in the public domain. These are marked by a red line on the left.
