حیاتِ دل کا ذریعہ حضور کا مداح
حیاتِ دل کا ذریعہ حضور کا مداح
برائے دہر مسیحا حضور کا مداح
بہ فیضِ مصرعِ توصیفِ چہرۂ والشمس
بحورِ نور میں ڈوبا حضور کا مداح
ہو کعب ابنِ رواحہ رضا ہو یا جامی
ہے روحِ شوق کا کعبہ حضور کا مداح
ہمیشہ گرمیٔ تذلیل سے رہا محفوظ
بہ فیضِ ظلِ رفعنا حضور کا مداح
سنا کے مدحتِ جلوہ گہِ یزکیھم
دلوں کو کرتا ہے ستھرا حضور کا مداح
ثنائے صاحبِ والعصر میں کہاں تخصیص
ہے یعنی سارا زمانہ حضور کا مداح
سجی ہے محفلِ میثاق سامعیں مرسل
ہوا ہے بانیِ جلسہ حضور کا مداح
نوائے نورِ ثنائے نبی سے کرتا ہے
حریمِ جاں میں اجالا حضور کا مداح
حقیر کو جو معظمؔ بنانا چاہا تو
اسے خدا نے بنایا حضور کا مداح
Additional information available
Click on the INTERESTING button to view additional information associated with this sher.
About this sher
rare Unpublished content
This ghazal contains ashaar not published in the public domain. These are marked by a red line on the left.
