نسباً آپ ہیں انفس اے زکی و انفس

نسباً آپ ہیں انفس اے زکی و انفس

حسباً آپ ہیں اقدس اے زکی و انفس

اصلِ مسجودِ ملک تیری طرف ساجد ہیں

کعبہ و بیتِ مقدس اے زکی و انفس

عرصۂ نافیٔ عرفانِ اقارب میں بھی

آپ ہی ہیں کسِ بے کس اے زکی و انفس

مطلعِ نورِ خدا حیدر و زہرا حسنین

خوب ہے نظمِ مخمس اے زکی و انفس

ترا ناعت مرا گفتہ مری دھڑکن دھڑکن

تری ذاکر مری نس نس اے زکی و انفس

کعبہ و عرش سے وہ خاک بھی افضل ٹھہری

جو ترے جسم سے ہے مس اے زکی و انفس

تیغِ لب جو نہ چلائے ترے اعدا کے خلاف

وہی شیطان ہے اخرس اے زکی و انفس

شہد ہو قند کہ مصری کہ ہو چینی سب میں

تیرے لہجے کا گھلا رس اے زکی و انفس

ہیں سبھی لفظ ترے گرد بہ احرامِ ثنا

ہوں معرب کہ مفرس اے زکی و انفس

ہے ترا دستِ یداللہ سرِ اہلِ طلب

ہے ترا بس بسِ بے بس اے زکی و انفس

بھیج فاروق سا گلزار گرِ دشت کہ اب

ہاتھ بندر کے ہے ماچس اے زکی و انفس

تیری نسبت سے معظمؔ ہے ترا رشکِ چمن

ورنہ اس سے ہیں بھلے خس اے زکی و انفس