اللہ اللہ کثرتِ انوارِ فیضانِ جمال

اللہ اللہ کثرتِ انوارِ فیضانِ جمال

لوح و خامہ عاجز از تحریرِ لمعانِ جمال

کیا سمجھ پاؤ گے تارو شانِ سلطانِ جمال

مہر و مہ پرور ہیں جب ان کے گدایانِ جمال

یوں بلالِ احمدی کا ہے بچھا خوانِ جمال

حوریانِ خلد بھی ہیں ریزہ خوارانِ جمال

اللہ اللہ طلعتِ ملکِ سلیمانِ جمال

ہے ہر اک محکوم بلقیسِ خیابانِ جمال

عاشقانِ زلف کو کیا گرمیٔ محشر کا غم

ابر بن کر چھائیں گے گیسوئے سلطانِ جمال

ہجر کی ظلمت میں گم ہے سوزنِ وصلت شہا

خندۂ لب سے ادھر بھی کوئی لمعانِ جمال

آیۂ قد جاءکم برھان کا اعلان ہے

ہیں شہا حسنِ ازل پر آپ برہانِ جمال

قبحِ عصیاں کو معظمؔ حسنِ طاعت جو کرے

نعت ہے الحمدللہ ایسا سامانِ جمال