عرش سے طور تک طور سے تا حرا چاندنی چاندنی کہکہشاں کہکشاں

عرش سے طور تک طور سے تا حرا چاندنی چاندنی کہکہشاں کہکشاں

جلوۂ مصطفیٰ نور کا سلسلہ چاندنی چاندنی کہکشاں کہکشاں

اب زمیں کو فضیلت ہے افلاک پر اِک سراجِ منیر آ گیا خاک پر

چار جانب وہ نور اپنا پھیلا گیا، چاندنی چاندنی کہکشاں کہکشاں!

مصطفیٰ کی جھلک والقمر کی ضیا اور صحابہ میں ہے حسن والنجم کا

آپ بدرالدجیٰ وہ ہیں نجم الہدیٰ چاندنی چاندنی کہکشاں کہکشاں

برقِ ایمن بھی ہے نور فاراں بھی ہے چار سو جلوہ گر حسنِ یزداں بھی ہے

بقعۂ نور اب ذرہ ذرہ ہوا چاندنی چاندنی کہکشاں کہکشاں

ظلمتِ دہر جس سے منور ہوئی، یہ زمیں جس سے جلووں کی پیکر ہوئی

وہ یتیم عرب جس سے عالم بنا چاندنی چاندنی کہکشاں کہکشاں

مرحبا نورِ احمد کی یہ تاب و تب جگمگانے لگا ریگزارِ عرب

دن بنا دلربا شب نبی مہ لقا چاندنی چاندنی چاندنی کہکشاں کہکشاں

جب زمیں پر ہوئی ان کی جلوہ گری آسماں سورۂ نور پڑھنے لگا

دے رہے ہیں شہادت یہ ارض و سما چاندنی چاندنی کہکشاں کہکشاں

آفتابِ رسالت کا کیا پوچھنا کرۂ ارض پر جب ہوا رونما

نور پھیلا گیا از کجا تا کجا چاندنی چاندنی کہکشاں کہکشاں

جب مبارکؔ جہاں میں حضور آ گیے لے کے ساتھ اپنے پیغام نور آ گیے

اک سماں پیش تھا لیلۃ القدر کا چاندنی چاندنی کہکشاں کہکشاں