مرحبا صل علیٰ توقیرِ عثمان غنی

مرحبا صل علیٰ توقیرِ عثمان غنی

مصحفِ یزداں میں ہے تحریر عثمانِ غنی

یہ زمیں کیا ہے لقب کہتا ہے ذوالنورین کا

ہے مہ و خورشید میں تنویرِ عثمانِ غنی

کون ہے جس کو مکرر فخرِ دامادی ملا؟

چشم احمد میں تھی وہ توقیر عثمانِ غنی

قیمتاً جس کو خریدا دولتِ ایثار سے

مرحبا جنت ہے وہ جاگیر عثمانِ غنی

ڈھونڈنے نکلی حیا اپنے لیے جائے پناہ

ہو گئی آکر وہ دامن گیرِ عثمانِ غنی

کاتبِ وحی الٰہی جامع القرآن بھی

لوح پر مرقوم ہے تحریر عثمانِ غنی

اللہ اللہ شانِ رحما بینھم سرتا قدم

کھینچ دی قرآن نے تصویرِ عثمانِ غنی

ذاتِ ذوالنورین میں دو ہجر توں کا نور ہے

حبش تایثرب گئی تنویر عثمان غنی

مصطفیٰ کا ہاتھ تھا یا ہاتھ عثمان کا

بیعت رضواں میں یہ توقیر عثمانِ غنی

چشم پوشی، عفو، ایثار و صلہ رحمی، کرم

بس یہ کچھ لے دے کے تھی تقصیرِ عثمانِ غنی

بئرِ رومہ بخشنے والے یہ پانی بند تھا

تھی مدینے میں یہ دارو گیر عثمانِ غنی

سر بکف حسنین پہنچے پاسبانی کے لیے

کون کرتا جرأت تحقیر عثمان غنی

خود علی مرتضیٰ امداد کو پہنچے مگر

تھی شہادت زینتِ تقدیرِ عثمان غنی

جنگ صفین و جمل میں بیعت رضوان میں

ہے مبارکؔ جذبۂ توقیرِ عثمان غنی