قربتِ فخرِ رسل بنتی ہے برہانِ علی

قربتِ فخرِ رسل بنتی ہے برہانِ علی

اہل ایماں جانتے ہیں عظمت و شانِ علی

ایک عالم ہو رہا ہے منقبت خوانِ علی

مرحبا اوصافِ حیدر مرحبا شانِ علی

سید اہل شباب خلد ہیں زہرا کے پھول

زینت فردوس ہیں گلہائے بستانِ علی

عتبہ و شیبہ عمر بن عبد ود مرحب سے پوچھ

قوتِ بازوئے حیدر تیغ برانِ علی

آنکھ بابِ العلم نے کھولی نبی کی گود میں

شہر علم و آگہی نکلا دبستان علی

تھے عزیز از جاں ابوبکر و عمر عثمان کے

سارے اہل مرتبت تھے مرتبہ دانِ علی

مصحفِ رخ کی تلاوت روز و شب صبح و مسا

مصطفیٰ کی ذات بھی گویا تھی قرآنِ علی

کمسنی میں کون یوں باندھے گا پیمانِ وفا

اولیت پا گیا بچوں میں ایمان علی

کہہ کے ختم الاؤلیا ہارون کی دے کر مثال

سرورِ عالم ہوئے خود تہنیت خوانِ علی

اک زمانہ معترف ہے ان کے لطف و جود کا

ایک عالم ہے مبارکؔ زیرِ احسانِ علی