ٹھکانا ہر جگہ تیرا ہے منزل چار سو تیری

ٹھکانا ہر جگہ تیرا ہے منزل چار سو تیری

تجھے میں نے وہیں پایا جہاں کی جستجو تیری

جسے محبوب سمجھا شان لولاکی عطا کر دی

جسے چاہا وہ ٹھہرا دو جہاں میں آرزو تیری

کبھی ایمن کی وادی میں کبھی فاراں کی چوٹی پر

ہوئی ہے جابجا جلوہ گری اے شمع رو تیری

تیرے بحر کریمی کا کرے گا کون اندازہ ؟

کرم ہے یم بہ یم تیرا ہے رحمت جو بہ جو تیری

تیرے بس میں دل و دیدہ یہ گرویدہ وہ نادیدہ

نظر کو جستجو تیری تو دل کو آرزو تیری

یہ قہاری و جباری بجا اپنی جگہ مولیٰ

امید افزا ہے لیکن آیت لا تقنطوا تیری

حجابات تعین لاکھ پر وہ دار ہیں لیکن

تماشا جابجا تیرا تجلی کوبکو تیری

عنادل تیری مدحت میں ہیں مصروف نواسنجی

ثنا خوانی چمن میں کر رہے ہیں رنگ و بو تیری

نبی کی عبدیت نے فرق پیدا کر دیا ورنہ

تھا جلوہ من و عن تیرا تھی صورت ہو بہو تیری