خیال کو عطر دان کر لوں تو نعتِ پاکِ رسول لکھوں

خیال کو عطر دان کر لوں تو نعتِ پاکِ رسول لکھوں

معنبر اپنی زبان کر لوں تو نعتِ پاکِ رسول لکھوں

جو عاصی امت کے غم میں آنسو بہاتے ہیں صبح و شام ہر دم

انہیں کا غم حرزِ جان کر لوں تو نعتِ پاکِ رسول لکھوں

کراؤں الفاظ کو وضو اور قلم کو مشکِ ختن سے دھو لوں

پرے فلک سے گمان کر لوں تو نعتِ پاکِ رسول لکھوں

تمام امت غلامِ رحمت ہیں جن کے دربارِ عالیہ میں

نثار ان پر میں جان کر لوں تو نعتِ پاکِ رسول لکھوں

کتابِ ہستی مری بھی چمکے دل و جگر جان و تن کو میں بھی

غلامِ رشکِ جہان کر لوں تو نعتِ پاکِ رسول لکھوں

جمالِ مولیٰ کمالِ سیرت حسین آنکھیں وہ کالی زلفیں

میں ان کا پہلے بیان کر لوں تو نعتِ پاکِ رسول لکھوں

جہاں کی رنگینیوں کو عقل و خرد سے نابود کر کے ان کی

ذرا مدینے کا دھیان کر لوں تو نعتِ پاکِ رسول لکھوں

نبیِ رحمت پہ آصفؔ اپنے درود پڑھ کر سلام پڑھ کر

میں پاک اپنی زبان کر لوں تو نعتِ پاکِ رسول لکھوں