فروغِ بزمِ عالم کا سبب اور رہنما کہیے

فروغِ بزمِ عالم کا سبب اور رہنما کہیے

ازل کا راز کہیے یا ابد کا سلسلہ کہیے

جہاں کی اصل کہیے یا وجودِ کائناتِ جود

محمد مصطفیٰ کہیے امام الانبیا کہیے

فلک کس نور سے روشن زمیں کس کے قدم سے باغ

سحر کس کی تجلی سے ہوئی عالم میں وا کہیے

کیا کس نے پیام انسانیت کا عام دنیا میں

یہ کس نے امنِ عالم کا بتایا راستہ کہیے

بتایا کس نے دنیا کو مقام و عظمتِ نسواں

ضعیفوں کا سہارا کون ہے اس کے سوا کہیے

یہ کون آیا ہے بیواؤں کے حق کی بات کرنے کو

یتیموں کے لیے درّ یتیم و آسرا کہیے

کوئی محبوب اپنا دے محبت بھی کرے لازم

سنا ہے اس سے پہلے کوئی ایسا واقعہ کہیے

وہ جس کی پیروی میں دین و دنیا کی بھلائی ہے

اسی کو دہر کا اول سے آخر مقتدا کہیے

لگا دیجے سبھی احکامِ شرع و دیں مرے اوپر

مگر جو ان کا دیوانہ ہے دیوانے کو کیا کہیے

جمالِ مصطفائی ہے کہیں خون حسینی ہے

کہیں خاک شفا کہیے کہیں کرب و بلا کہیے

کوئی ہو نورِ کامل اور ہو انسانِ کامل بھی

ہوا ہے کون ایسا ماسوائے مصطفیٰ کہیے

زمیں تا آسماں برپا صدائے ھا و ھو کیوں ہے

یہ کس کے واسطے ہر سو صدائے مرحبا کہیے

جہاں تاریک تھا ہر چار سو تھی جبر و سفاکی

مٹایا کس نے دنیا سے اندھیرا اور جفا کہیے

بروزِ حشر ہو یا سرگزشتِ غم سنانے کو

کسی کو اس نے چھوڑا ہے کبھی بے آسرا کہیے

یہ کیسی بات ہے عاشق کو یہ بتلانا پڑ جائے

جب ان کا نام آئے مرحبا صلیٰ علی کہیے

خیال آئینہ الفاظ آبگینہ معرفت نامہ

جو کہیے نعت آقا کی بہ اندازِ رضا کہیے

محمد حامد و محمود اور حماد و احمد بھی

خدا جس کو سراہے اس کو آصفؔ کیا سے کیا کہیے