مجھ پہ اتنا تو کرم خالق_اکبر کر دے

مجھ پہ اتنا تو کرم خالق اکبر کر دے

ان کے جلووں سے میرا قلب منور کر دے

تاج والے تیرے ادنیٰ سے بھکاری بن جائیں

تو جو چاہے تو گداؤں کو سکندر کر دے

حکم دریا کو جو دے دے تو وہ صحرا بن جائے

خشک صحرا کو تو دم بھر میں سمندر کر دے

گنگ ہو جائیں بس اک آن میں سب اہل زباں

ایک امی کو جو تو علم کا مصدر کر دے

اے حسیں تو جو الٹ دے رخ تاباں سے نقاب

سارے عالم کو ابھی بے خود و ششدر کر دے

عشق کا نشہ ہو ایسا کہ مٹا دوں ہستی

ہر نظر کو مئے توحید کا ساغر کر دے

التجا ہے ترے ستارؔ کی تجھ سے یا رب

اب میرا عشق محمدؐ ہی مقدر کر دے