بانی اسلام اے خورشید تابان عرب

بانی اسلام اے خورشید تابان عرب

اے محمد مصطفیٰ جانِ عرب شان عرب

ظل اقدس سے پھلا پھولا گلستانِ عرب

جگمگایا نور وحدت سے بیابانِ عرب

آپ کے پیغام کی بنیاد تھی الہام پر

اک نئی دنیا بسا ڈالی خدا کے نام پر

اپنے مسلک کے محافظ اپنی امت کے کفیل

سینۂ شفاف کی خاکِ مدینہ ہے دلیل

آپ نے کردی نجات روح کی پیدا سبیل

حشر میں اہل صفا کے آپ ہی ہوں گے وکیل

لاکھ کعبے ضوفشاں تھے دیدۂ پُر نور میں

روشنی پیدا نہ تھی ایسی چراغ طور میں

آپ پر نازل خدائے پاک نے قرآں کیا

سرمۂ توحید سے وا دیدۂ عرفاں کیا

آشکارا زندگی کا جو ہر پنہاں کیا

پیکر اقدس کو رشک کعبۂ ابہاں کیا

جو نہ سمجھے آپ کا رتبہ وہ اہلِ دل نہیں

اور کوئی جادۂ تسلیم کی منزل نہیں

دانا ہے چشم ضمیر اب تک نہ صاحب دل ہوں میں

دور ہے کوسوں جو بیداری سے وہ غافل ہوں میں

ناشناسِ راز پنہانِ حق و باطل ہوں میں

کیسے پھر اسلام کی تفہیم کے قابل ہوں میں

گو مسلماں میں نہیں پر قائل اسلام ہوں

کیوں کہ مردانِ خدا کا بندۂ بے دام ہوں

جانتے ہیں راز مردانِ خدا اسلام کا

ہیں سمجھتے مربتہ اہلِ صفا اسلام کا

ہے فقط عشق الٰہی مدعا اسلام کا

اور کچھ مقصد نہیں اس کے سوا اسلام کا

ہو بنا نفرت پہ جس کی یہ وہ مذہب ہی نہیں

دوسروں سے ترک الفت اس کا مطلب ہی نہیں

سرزنش کافر کی اور اسلام نا ممکن ہے یہ

ہو دلآزاری سے اس کا کام ناممکن ہے یہ

دے کسی کو موت کا پیغام نا ممکن ہے یہ

ہاتھ میں لے تیغ خوں آشام ناممکن ہے یہ

اور جو کرتے ہیں ایسا آڑ میں اسلام کی

دھجیاں اڑتی ہیں ان کے جامۂ احرام کی

مذہبی دیوانگی اسلام کا عنصر نہیں

عقل پر صیقل یہ کرتا ہے جنوں پرور نہیں

قلب کے جذباتِ حیوانی کا یہ مظہر نہیں

نفس کے افعال شیطانی کا یہ مصدر نہیں

اور جو قائل ہے اس کا وہ مسلماں ہی نہیں

بندۂ اسلام ہو کیسے جو انساں ہی نہیں

خون کافرپر نہیں حصر و قیام اسلام کا

اس پہ مستحکم نہیں ہرگز نظام اسلام کا

حب عالمگیر سے چمکا ہے نام اسلام کا

ورنہ میں کرتا نہ ہرگز احترام اسلام کا

وید میں تعلیم جو کچھ ہے وہی قرآں میں ہے

نقص اگر کچھ ہے تو فہم و دانش انساں میں ہے

کھیل کیوں سمجھا ہے اک اہل شریعت نے اسے

طاق پر رکھا ہے کیوں اہلِ عبادت نے اسے

کر لیا قبضہ میں ارکانِ حکومت نے اسے

کر دیا بدنام ارباب سیاست نے اسے

جس کا بانی آپ سا ہادی ہے یہ وہ دین ہے

اس کی پابندی نہ کرنا آپ کی توہین ہے

کیوں ہیں تاویلیں یہ الٹی آپ کے احکام کی

صبح نورانی میں کیوں شامل ہے ظلمت شام کی

پھر ہو عظمت آشکار ا آپ کے پیغام کی

لیجیے آکر خبرپھر عالم اسلام کی

نام پر مذہب کے ظلم و جور کی بدعت نہ ہو

راحلِ بے راہ یعنی آپ کی امت نہ ہو