شاعرِ شیریں بیاں، معجز رقم، صاحبِ نظر

شاعرِ شیریں بیاں، معجز رقم، صاحبِ نظر

خسروِ عالی مراتب، مرکزِ علم و ہنر

صوفیٔ محفل نشیں، درویش، خلوت آشنا

سالکِ راہِ طریقت، حق پرست و حق نما

موجدِ سازِ طرب انگیز و رقت آفریں

روح پرور، کیف زا یعنی ستارِ دل نشیں

سوز و سازِ زندگی کی تو نے بخشا ہے وقار

خسرو خسرو کی صدا دیتا ہے اب تک ہر ستار

فنِ موسیقی کو تو نے کر دیا ہے لازوال

تیرے دم سے آج تک ہے رونقِ بزمِ خیال

یوں تو ہر پہلو سے حاصل تھا تجھے اعلیٰ مقام

عشقِ ’’محبوبِ الٰہی‘‘ نے مگر بخشا دوام

بیخودی میں بھی رہا پاس ادب کا تجھ کو ہوش

جذبۂ منصور سے دل آشنا تھا، لب خموش

مشترک تہذیب کا آئینہ تھی تیری زباں

تیرے مسلک میں نہ تھا کچھ فرقِ ناقوس و اذاں

سبحہ و زنار کے رشتوں کو یک جا کر دیا

پرچم انسانیت کو تو نے اونچا کر دیا

مصرعۂ حافظؔ پہ تھا تیرا عمل ہر صبح و شام

با مسلماں اللہ اللہ با برہمن رام رام