نازاں ہے اس گلی سے آکر نسیم کیسی

نازاں ہے اس گلی سے آکر نسیم کیسی

آغوش میں لیے ہے اپنے شمیم کیسی

بخشی گئی ہے امت محشر میں مصطفیٰ کی

حسرت سے تک رہی ہے قوم کلیم کیسی

محشر میں ابر رحمت برسا جو عاصیوں پر

کافور ہو گئی ہے نار جحیم کیسی

اخلاق کے صلے میں حق سے ملا ہے خلعت

قرآں میں ہے یہ مدح خلق عظیم کیسی

ہے پیشوا ہمارا وہ رحمت دو عالم

رحمت یہ تو نے بھیجی رب رحیم کیسی

جو نور اولیں تھا وہ آخرالزماں ہے

حکمت نہاں تھی اس میں رب حکیم کیسی

اصحاب وہ جری تھے جس سمت ٹوٹ پڑتے

ہوتی تھی کافروں پر فتح عظیم کیسی

توفیق نعت گوئی فائقؔ کو تو نے دی ہے

تیری عنایتیں ہیں رب کریم کیسی