کھول دو سینہ مرا فاتحِ مکہ آکر

کھول دو سینہ مرا فاتحِ مکہ آکر

کعبۂ دل سے صنم کھینچ کے کر دو باہر

پردے غفلت کے نگاہوں سے ہٹا دو یکسر

مجھ سیہ کار پہ فرما دو عنایت کی نظر

نورِ ایماں سے مرا سینہ منور کر دو

دل میں عشق رخ پُرنور کا جذبہ بھر دو

دل تاریک کرم ہو تو مجلی ہو جائے

تیرہ آئینہ توجہ سے مصفا ہو جائے

سینہ انوار گہِ جلوۂ مولیٰ ہو جائے

دل میں تم آؤ تو دل عرش معلیٰ ہو جائے

نور ایماں سے مِرا سینہ منور کردو

دل میں عشق رخ پُرنور کا جذبہ بھر دو

دل میں حرص و ہوس و خواہش دنیا نہ رہے

آپ کا عشق رہے غیر کا خطرہ نہ رہے

آپ کی یاد ہو سر میں کوئی سودا نہ رہے

دل مدینہ رہے اور دیر و کلیسا نہ رہے

نور ایماں سے مرا سینہ منور کردو

دل میں عشق رخ پُرنور کا جذبہ بھر دو

جلوہ فرمائیے قالب میں مری جاں ہو کر

سلطنت کیجیے اس جسم میں سلطاں ہوکر

آپ میں ہو کے فنا آپ پہ قرباں ہو کر

قدسیوں کو بھی تو دکھلا دوں میں حیراں ہوکر

نورِ ایماں سے مرا سینہ منور کر دو

دل میں عشق رخ پُرنور کا جذبہ بھر دو

بندۂ در گہِ عالی پہ نعیمؔ بے کس

شامتِ نفس سے ہے آہ گرفتار ہوس

کیجیے اس کو رہا توڑیے سب بند و قفس

دردِ لب تادمِ آخر رہے نامِ اقدس

نورِ ایماں سے مرا سینہ منور کر دو

دل میں عشق رخ پُرنور کا جذبہ بھر دو