اے زائرِ کوئے نبی اتنا تو کر اے مہرباں

اے زائرِ کوئے نبی اتنا تو کر اے مہرباں

اہل مدینہ کو سنا حالِ نعیمِ خستہ جاں

مایوسیوں کی کثرتیں ناکامیوں پر حسرتیں

تنہائیوں کی وحشتیں اندوہ غم کی داستاں

بیتابیوں کا سلسلۂ بے چینیوں کا مشغلہ

نا صبریوں کا غلغلہ اور شدتِ دردِ نہاں

سر میں ہے سودائے جنوں وحشت سے ہے حالت زبوں

دل سے ہوا رخصت سکوں آنکھوں سے اشکِ خوں رواں

شدت پہ ہے دورانِ سر زوروں پہ ہے دردِ جگر

خوں رو رہی ہے چشم تر پھٹ کر ہوا ہے دل کتاں

جاتے رہے تاب و تواں اعضا میں قوت ہے کہاں

غم نے کیا ہے نیم جاں دردِ جدائی الاماں

یہ شورشِ طوفانِ غم یہ سوزشِ رنج و الم

ہجراں کے یہ جور و ستم اور ضعیف و ناتواں

دن حسرتوں میں کاٹنا راتوں کو رونا جاگنا

ہر وقت غم کا سامنا ہر لحظہ آنکھیں خوں فشاں

اعدا کے نرغے ہیں جدا اپنے ہوئے ہیں بے وفا

ہر سمت سے آئی بلا آفت کا ٹوٹا آسماں

جور و ستم کی بارشیں اور دشمنوں کی سازشیں

بیکار ہیں سب نالشیں مسلم کا خوں ہے رائیگاں

ہم کیا کہیں حالِ تباہ ہم سے ہوئے بے حد گناہ

بے شک ہیں ہم نامہ سیاہ نادم ہیں اب ہم بے گماں

ربی ظلمنا نفسنا تبنا الیک ربنا

فاغفر لنا ماقد مضیٰ بخش اے رحیم بے کساں

یا اہل طیبہ انظرو احوالنا ثمّ اذھبو

عند الشفیع و اشفعو فی حضرتہ بالجناں

قولو الہ خیرالوریٰ ارحم علیٰ من قد عصیٰ

جاء الیک تائباً کن در گزر از جرمِ آں

اے خاتمِ پیغمبراں اے سرورِ ہر دوجہاں

اے مالکِ کون و مکاں رحمے بحالِ عاصیاں

اے رحمتِ عالم مدد اے سیدِ اکرم مدد

اے دافعِ ہر غم مدد امداد اے شاہجہاں

فریاد اے سلطانِ دیں اے رحمۃ للعالمیں

تم ہو شفیع المذنبیں اس در سے ہم جائیں کہاں

فریاد اے محبوب رب فریاد اے شاہِ عرب

ہم تم سے کرتے ہیں طلب دل کی مرادیں ہر زماں

دل کی مرادیں دیجیے مسرور ہم کو کیجیے

اب تو خبر لے لیجیے غم ہوچکے ہیں بیکراں

ہم کو خلاصی ہو عطا ہو دور سب رنج و بلا

آفت کی گھٹ جائے گھٹا چمکیں نہ غم کی بجلیاں

اب کیجیے ایسا کرم ہو دین کا اونچا علم

کفار کی گردن ہو خم ان کا مٹے نام و نشاں

اسلام کی لیجے خبر اور کفر کو پہنچے ضرر

کفار ہوں زیر و زبر سب بھول جائیں مستیاں

مسلم کو پھر شوکت ملے اسلام کو قوت ملے

بدخواہ کو ذلت ملے اے دینِ حق کے پاسباں

ذوقِ عبادت ہم کو دو شوقِ ریاست ہم کو دو

سنت کی رغبت ہم کو دو ہم سے ادا ہوں نیکیاں

مسلم ہوں باہم متحد بھائی کا بھائی ہو ممد

مٹ جائے سب آپس کی ضد رشک و حسد سے ہو اماں

طیبہ میں اپنے لطف سے اذنِ اقامت دیجیے

فرقت سے دل بے تاب ہے کب تک رہوں ہندوستاں

راہِ مدینہ دور ہے بندہ بہت رنجور ہے

اور حاضری منظور ہے امداد سلطانِ جہاں

یا ربنا صلِّ علی محبوبک محبوبنا

ازکیٰ صلٰواۃ دائماً انمی صلوٰۃِ کلِّ آنٍ

یا ربنا سلم علیٰ روحِ النبی المصطفیٰ

والآلِ و الصحب الیٰ مادار دوران الزماں