اللہ اللہ محمد ترا نام اے ساقی

اللہ اللہ محمد ترا نام اے ساقی

ان گنت تجھ پر درود اور سلام اے ساقی

خستہ جانوں سے کوئی پوچھے حلاوت اس کی

راحتِ جان و جگر تیرا نام اے ساقی

کبھی تنہائی میں محسوس کیا کرتا ہوں

صحنِ دل میں ترا آہستہ خرام اے ساقی

دل مرا ڈوب رہا ہے کہ تہی دامن ہو

ہونے والی ہے ادھر زیست کی شام اے ساقی

ایک امیدِ شفاعت ہے فقط زادِ سفر

جس سے ہمت سی ہے کچھ گام بہ گام اے ساقی

لاج رکھنا کہ ترے رحم و کرم پر ہے نفیسؔ

ہے ترے در کا غلام ابنِ غلام اے ساقی